秋天去日本旅行想體驗與眾不同嘅紅葉之旅？咁你一定要將谷川岳放入賞楓行程當中，因為可以欣賞遍山紅葉之外，仲可以乘搭纜車喺紅葉之間穿梭，登上海拔逾1,500米山峰。如果好似Raven咁喺11月前往，仲可以同時飽覽紅葉+雪景！文末為大家整理咗交通方法，有興趣嘅朋友可以參考下～
谷川岳介紹-東京近郊紅葉必訪
位於群馬縣上信越高原國立公園嘅谷川岳景區，由星野集團管理同營運。谷川岳山脈高達有1,977米，除咗秋季可以睇到紅葉，冬季山上亦有滑雪場開放。遊客可以乘坐全年開放嘅谷川岳Joch登山纜車，輕鬆登上海拔1,319米嘅天神平纜車站，沿途風景絕對會令你深刻難忘，尤其係秋季時穿梭紅葉之間嘅風光。纜車站旁有一間View Terrace Tenjin餐廳，可以享用餐廳食物嘅同時，欣賞接近180度嘅山景。
我哋係因為睇咗呢條🔗YouTube影片，所以決定去谷川岳睇紅葉，點知錯有錯著係紅葉尾水，同時可以見到雪山景
一之倉澤 （ 一ノ倉沢）
一之倉澤絕對係10-11月紅葉盛開期間前往谷川岳其中一個必訪景點。
喺纜車站外行過去谷川岳山岳資料館旁嘅山路，用大約40-50分鐘就可以行到一之倉澤。如果時間啱，仲有🔗電動車接載遊客前往。
谷川岳Joch登山纜車
谷川岳係一個比較受歡迎嘅行山、攀岩嘅地方，所以其他季節唔少行山人士都會嚟呢度行山，當然亦有方法可以行到上山頂。
而對普通遊客而言，纜車係上山嘅主要方法，大約10分鐘就可以上到海拔1,319米嘅天神平。
如果11月初嚟到谷川岳，坐上登山纜車就可以遇到IG影片超夢幻嘅紅葉景色。而我哋咁啱遲咗一星期，喺上纜車嗰陣，周圍仲見到紅葉，不過隨住纜車逐漸靠近山頂，周圍都被白雪覆蓋，景色同樣夢幻！
天神平纜車站
抵達山頂一踏出纜車站就係雪地，完全置身喺雪山之中，温度都明顯比山下更加涼爽，所以我哋決定入餐廳食個brunch暖一暖身先！
View Terrace Tenjin餐廳
餐廳嘅景色真心一絕，接近180無死角嘅雪景，食住熱辣辣嘅焗芝士包、咖哩飯，真係好快個人又變返笠笠。
天神峠山頂
食完嘢補充完體力之後，我哋就行起坐吊椅登上1,502米高嘅天神峠山頂，行一陣就會見到規模勁細嘅天滿宮神社。
喺吊椅站附近有一個谷川岳嘅標高牌可以畀大家影相打卡，除咗背景係雪山之外，仲落住雪個感受真係特別難忘。
離開谷川岳緊接可以安排咩行程？
谷川岳附近係群馬嘅温泉區，無論係水上站/湯檜曽都有唔少温泉旅館，我哋今次離開谷川岳之後，就會入住湯檜曽一個温泉旅館體驗一泊二食，文章寫好就會放返喺度畀大家參考。
東京如何前往谷川岳？
由東京出發前往谷川岳並唔需要自駕遊，乘搭新幹線同巴士，大約2小時就到達谷川岳！下面會用11月旅旅嘅時間表做分享，相關嘅交通時間會放連結畀大家參考。
乘搭上越新幹線：由[上野車站]前往[上毛高原車站]
由上野車站或東京車站都可以乘搭上越新幹線，大家可以按需要揀選由上野或東京出發。如果由上野車站出發，喺新幹線售票機買車飛時可以揀UENO作為出發車站、JOMO-KOGEN作為目的地車站，由於上越新幹線係全指定席，建議大家可以盡早買定車票。
今次我哋乘搭08:58由上野車站開往上毛高原車站嘅Toki 309 JR列車，10:03準時抵達。
轉乘關越交通水上線巴士： 由[上毛高原車站]前往[谷川岳Joch]
喺上毛高原車站出閘後，車站東出口一出就係開往谷川岳嘅巴士站。
而我哋轉乘嘅係10:20分開出嘅巴士班次，如果錯過咗呢班車，要等到11:27先有下班車。
呢班巴士途中會經過另一個JR車站：水上車站，呢度開出嘅巴士班次會比較密，適合由高崎/湯澤出發嘅朋友。
巴士終點地就係谷川岳Joch，落車位置就係登山纜車站外面。
巴士時間表 (前往谷川岳Joch)
| 開出車站 | 上毛高原車站 | 水上車站 |
|---|---|---|
| 巴士開出時間 | 08:00 08:35 09:30 10:20 11:27 12:30 | 08:25 09:00 09:55 10:45 11:35 11:52 12:55 13:20 |
以上係Raven2025年11月下載嘅班次表，大家亦可以上🔗關越交通水上線睇最新時刻表：下り：谷川岳ヨッホ・湯の小屋方面。
到達目的地：谷川岳Joch
巴士由上毛高原車站沿路可以遠望到周圍街道都有楓樹，高山上都係鋪滿白雪。落車後，巴士就停泊喺纜車站外嘅停車場，十分方便。
離開谷川岳：乘坐巴士返回水上車站或上毛高原車站
以上係Raven2025年11月下載嘅班次表，大家亦可以上🔗關越交通水上線睇最新時刻表：上り：水上駅・上毛高原駅方面。
大家要留意巴士由谷川岳纜車站開出嘅尾班車時間係17:05，建議大家視乎當日人流預留時間排隊。大家行程安排可以揀前往水上車站或上毛高原車站。我哋行程入面安排咗嘅温泉旅館喺JT34ゆ び そ 温 泉 街，想知我哋嘅温泉旅館體驗可以期待下篇文章。
