今次同大家分享一間位置喺新宿嘅人氣烏冬店 Udon Shin。如果你都係鍾意食烏冬嘅朋友應該打開Tabelog都會見到佢，味道先唔講好唔好味，呢間小店排隊嘅安排真係難以預計咁痛苦…
排隊安排
呢度重點分享當日排隊經歷，以免大家到店舖門口排錯隊！雖然去到烏冬店門口可能會見到有人排隊，但係千祈唔好以為直接排就得，因為你要去門口部Tablet拎張飛先，叫到你個號碼先需要去門口排隊！
我哋當日就係盲舂舂喺門口排咗陣隊，到後來有店員出嚟招呼排隊人士先知要拎飛先，跟住拎完飛見要排1個鐘，所以就返去新宿車站附近行街。到咁上下時間，我哋行返去先發現原來要門口再排多接近1個鐘隊。而每個出嚟嘅外國遊客都會講：It worths the waiting!
Udon Shin 餐牌
Udon Shin都提供咗幾多冷暖款式選擇，不過定價偏高。
Udon Shin 評價
事前做資料搜集有睇過啲評分：Tabelog評分3.69；Google Maps評分3.9，但係當日食完覺得味道未去到話驚艷，事後覺得就算Tabelog分數唔低，都係未必可靠。
當日天氣比較涼，而且排隊落緊毛毛雨，所以叫咗兩碗熱拌烏冬：一碗係用生雞蛋同芝士撈埋食；另一碗係熱醬油同牛油撈埋一齊食。佢哋嘅讚岐烏冬唔算好彈牙，但係天婦羅嘅材料的確少見，而且食完個人暖返係舒服嘅。
可能呢間烏冬店主要做遊客生意，評價絕對畀遊客吹大咗，食物定價貴，如果需要等咁長時間先有得食，排隊安排又咁差，完全唔值得喺旅行時浪費時間體力去試！
我哋返到香港之後見丸亀製麵嗰期都出咗一碗類似嘅芝士撈烏冬，味道都有8成相似…
