今次出發去橫濱嘅八景島海島樂園最想係同小水獺互動,如果你都唔鍾意去動物Cafe,今次呢個行程一定好啱你!由東京出發大約1.5小時就可以抵達,而且仲可以睇埋橫濱嘅夜景同食埋晚餐先返東京,係好理想嘅一日行程好去處!
橫濱八景島海島樂園 園區介紹

橫濱八景島海島樂園位於八景島上,呢個島其實都開放畀大眾,就算冇買任何門票都可以到島上參觀。想進入水族館嘅朋友就需要買門票入內。

樂園有4個水族館可以透過買套票一日參觀晒、另外多樣機動遊戲設施可以單次買票遊玩,亦有唔同套票可以購買。
大家可以預早喺網上面買好門票,連同有興趣嘅體驗環節 Experience Program 一次過買就最方便,因為體驗環節只可以網上預訂,冇得即場購買。
超近距離觀賞各式各樣嘅動物




喺4個水族館有唔同嘅動物可以欣賞,部份露天園區仲可以超近距離睇到飼養員訓練海豚、親手摸魔鬼魚,亦有小白鯨表演,活動都相當精彩,所以都要留意每日唔同活動嘅時間表,以免錯過部份限時限量嘅表演。
橫濱八景島海島樂園 體驗活動介紹

橫濱八景島海島樂園有多個水上動物體驗環節,最特別相信係同海豚超近距離互動,價格公開透明,部份人氣活動可能好快畀人預訂咗,所以有計劃前往樂園,記得提早預訂。
如何預訂橫濱八景島海島樂園體驗活動

今次我哋喺網上面預訂咗小水獺餵食環節,成個過程都好簡單。下面會試範一次畀大家參考:

第一步:選擇體驗活動
出發前喺網站嘅體驗活動頁面,選擇想購買嘅活動後撳「Click here for details」

第二步:了解體驗活動詳情
網頁會清楚介紹活動費用、活動地點、每節人數上限、年齡要求等,了解一切後可以點擊網頁底部嘅「お申込みはこちら」按紐前往購買頁面。

第三步:確認活動
網站會再次顯示活動的詳情和條款,之後就可以撳「チケット購入に進む」

第四步:填寫資料並購買
選擇日期、時段後填寫所需資料,「都道府県」呢格可以揀海外,最後用香港信用卡就可以成功付款。
如何換取橫濱八景島海島樂園體驗活動門票

每個活動都喺預訂時寫到點樣換領體驗活動門票,以我哋購買嘅小水獺餵食活動為例,我哋喺水族館4樓Information Center度展示返確認電郵嘅QR-Code,職員就會打印返門票畀我哋過去排隊用。
東京前往橫濱八景島海島樂園交通方法

我哋今次係由酒店出發,所以選擇到品川站轉乘東海道本線到橫濱,然後乘搭京急本線到金澤八景站,轉乘海濱線到八景島站,步行3分鐘就抵達橫濱八景島海島樂園。大家可以視乎自己住宿選擇去品川車站或者新宿車站、東京車站再往橫濱方向出發。
橫濱八景島海島樂園值得去嗎?

我哋喺八景島海島樂園大約逗留咗4小時,離開嘅時候正值日落 (其實時間只係4點半),全日活動其實好豐富,一啲都唔會悶,而且有好多園區可以超近咁睇動物,比起平時喺香港海洋公園更近,個體驗的確唔錯,我哋都好推介大家可以抽時間去玩一日。
