今次揀嘅温泉旅館交通好方便，由谷川岳坐巴士大約15分鐘就到，周圍環境相當寧靜，設計都相當傳統。旅館周邊冇便利店，只有幾部汽水機，如果夜晚突然肚餓或者口痕，旅館都有少少杯麵同零食買。
Contents
天空之湯 NAKAYA 旅館 特色
今次揀天空之湯 NAKAYA 旅館其中一個原因係除咗浴場入面嘅温泉之外，旅館仲有2個位於天台嘅私人温泉，每間房預定使用40分鐘。過咗指定時間之後，例如深夜/早上，仲可以隨時使用。Check-in之後，除咗會有Welcome Drink外，仲可以根據你嘅喜好，去揀一套自己鍾意嘅浴衣，好多色好多款揀，唔同高度都有唔同碼數可以揀，連BB小朋友Size都有。
房間設備
今日入住嘅係日式Tatami客房，空間都相當足夠，放完床鋪都好多走動空間。房內可以連接WiFi、有電視機同水煲，可以喺走廊度拎。
房間入面只係設有廁所，冇浴室，所以沖涼需要到浴場。所以記得一定要喺大廳拎定適合自己嘅浴衣。
晚餐
晚餐Total有11個料理，相當豐富，用嘅主要係當地食材，而且味道新鮮之餘都好好味，勁有家庭感覺。由於料理數量多，旅館職員當晚分咗兩次送餐，按住我哋進食節奏咁送入嚟，我哋可以慢慢咁享用食物，值得一提係每一道料理放餐員工都會用英文簡單介紹。
早餐
早餐係自助餐形式，同浴衣一樣，旅館都提供唔同嘅盤、碗、碟、餐具畀我哋自由配搭使用。食物種類都多元化，當日仲有一個新鮮士多啤梨奶昔超好味。
温泉旅館房價
當時我哋係用Rakuten Travel預訂，扣埋優惠券係HK$1,490，每人只係HK$745，我哋都覺得好抵，有機會都想再去。不過都提提各位，呢個温泉旅館房間數量唔算好多，而且預訂率都幾高，所以建議預早最少1個月訂房會比較易Book到。
