秋天打算去東京自由行？想一次過睇到紅葉同雪山，去體驗一次不一樣嘅旅程？希望呢個行程滿足到你！行程重點：東京都廳免費夜景、谷川岳紅葉及雪山、温泉旅館一泊二食、玩爆哈利波特影城、橫濱八景島海景樂園同小水獺握手、東京巨蛋欣賞日韓棒球賽。相信4-8日東京行程都可以參考！
- Day 1重點：抵達成田機場 > Check-in 酒店 > 晚餐：Udon Shin
- Day 2 重點：遊覽巢鴨站周邊 > 遊覽新宿 > 東京都廳 > 晚餐：Coffee Seibu
- Day 3 重點：出發前往群馬縣 > 登上谷川岳 > Check-in 温泉旅館 > 晚餐：温泉定食
- Day 4 重點：早餐：温泉自助早餐 > 返回東京 > 午餐：吾妻橋藪蕎麥 > Check-in 酒店 > 六本木聖誕燈飾
- Day 5 重點：東京華納兄弟波利波特影城 > 晚餐：迴轉壽司 > 遊覽池袋
- Day 6 重點：前往橫濱 > 橫濱八景島海景樂園 > 同小水瀨握手 > 晚餐：RUCY+R咖哩
- Day 7 重點：遊覽澀谷 > 東京巨蛋睇棒球
- Day 8 重點：遊覽日暮里 > 前往成田機場
- 總結 (去趣行程連結)
Day 1重點：抵達成田機場 > Check-in 酒店 > 晚餐：Udon Shin
今個旅程唔想捱夜坐紅眼機，所以就揀咗國泰朝早出發嘅航班，同期其他廉航連埋行李都差唔多價錢，所以呢套機票CP值都好高。坐10點半機預計出到東京市區大約5點，而呢個季節喺東京嘅日落都相對早，所以check-in酒店未天黑，但係放低行李出返嚟已經天黑…咁一於都早啲去食個晚餐。
乘坐CX 504 前往東京成田機場
今次CX504嘅餐飲畀大家參考下，有港式同西式兩款選擇，味道正正常常，份量以早餐嚟講唔算細份。食完早餐睇吓戲聽吓歌就可以落機。
乘坐Skyliner前往日暮里
我哋喺日本當地時間大約下午4點完成入境手續後，立即前往SKYLINER櫃檯購買下一班前往上野方向嘅車票。因為我哋今次旅程預訂嘅酒店位於同樣係山手線，而且十分接近日暮里車站嘅駒込站，最後大約傍晚5點就到達駒込站。
入住酒店：JR東日本駒込METS酒店
今次旅行揀咗一間山手線駒込站旁一分鐘路程就到達嘅酒店，出入相當方便，距離日暮里站僅3站、上野5站。而且酒店可以寄存行李，方便我哋前往群馬縣谷山岳時可以輕裝上陣。
酒店詳細介紹：山手線住宿推介：JR東日本駒込METS酒店-寄存行李OK-出站1分鐘到達
JR東日本駒込METS酒店 地址
晚餐：人氣烏冬店 Udon Shin
喺酒店放低行李之後，就出發去晚餐地點。第一餐就揾咗間網上都多人推介、位置喺新宿嘅烏冬店。詳細可以睇返東京人氣烏冬店：Udon Shin值得食嗎？
到訪當日落過一陣雨，所以氣温都好清涼，入去坐低之後就叫咗兩碗熱食嘅烏冬。
味道方面可能因為喺外面吹過一陣，所以有暖嘅食物落肚好舒服，不過味道唔特別深刻，完全唔值得排咁耐。如果唔使排隊，就可以一試，但係如果遇著上面提到嘅排隊情況，我哋絕對建議應該揾過另一間餐廳。
Udon Shin 地址
Day 2 重點：遊覽巢鴨站周邊 > 遊覽新宿 > 東京都廳 > 晚餐：Coffee Seibu
由於行程第3日我哋計劃去群馬縣睇紅葉行下山，所以Day 2行程我哋冇特別plan，務求輕鬆咁過一日。第一站係由酒店位處嘅駒込站坐一個站就到達嘅巣鴨站，早餐揾到一間幾有特色嘅咖啡店。
早餐：昭和懷舊風 珈琲伯爵 巣鴨店
由餐廳門口到踏入咖啡店嗰刻都感覺到好濃嘅懷舊氣氛，店內侍應無論男女都著住一套簡單西裝，感覺好似穿越咗入一部90年代嘅日劇場景咁。
珈琲伯爵 地址
遊覽巢鴨＆新宿
巢鴨畀我哋嘅印象就好似行入咗當地人嘅日常生活咁，而呢個街道亦好有自己特色，當地居民將吉祥物融入晒生活，有專門店賣嘅環保袋、甚至內衣褲都有巢鴨造型。
東京都廳展望室夜景
到埗當日發現原來11月初去東京，要有心理準備5點就已經天黑，喺新宿行行逛逛之後，我哋都預早出發去東京都廳睇免費夜景。
東京都廳分別有南展望室同北展望室，大部份時間係同時開放，不過我哋當日咁啱係北展望室公休日，只係得南展望室開放，所以超多人排隊，最後都花左大約40分鐘時間先上到去位於45樓嘅展望室。展望室外圍都可以透過玻璃窗遠眺東京景色，晏晝嚟聽講有機會望到富士山；另外，展望室中間仲有手信舖可以買到一啲特色手信。
東京都廳展望室開放時間
上午9:30-晚上22:00，新年假期係公休日。南展望室 第1、3週週二／都廳大廈安檢日休息；北展望室 第2、4週週一／都廳大廈安檢日休息。詳細可以睇官方網站時間表。
Tokyo Night & Light光影表演
喺東京都廳整面牆身用嚟做光影表演，個效果震撼過香港個幻彩詠香江，而且唔少人都坐喺草地/瞓喺草地度睇，如果撞正播你鍾意嘅內容，感覺就更加正啦！而Tokyo Night & Light 每個月播放嘅內容都會有分別，出發前可以上官方網站睇當日各表演時段播放嘅內容決定前往時間。以下係2026年3月嘅例子：
Tokyo Night & Light開放時間
除惡劣天氣外，根據月份每日定時喺各時段上映。
晚餐：珈琲西武 本店
睇完燈光Show之後，我哋嚟到一間保留住昭和時代裝修嘅喫茶店：珈琲西武，環境復古得嚟舒服，同朝早去完嘅珈琲伯爵有種相似嘅感覺。
我哋簡單叫咗兩個咖喱蛋包飯解決咗晚餐，味道方面咖喱汁幾白幾惹味，而個蛋都好嫩，整體唔錯。之後我哋計劃早啲返酒店休息，迎接之後一日嘅行程。
珈琲西武 本店 地址
Day 3 重點：出發前往群馬縣 > 登上谷川岳 > Check-in 温泉旅館 > 晚餐：温泉定食
今個旅程嘅重點行程：距離東京只係2小時車程嘅谷川岳，由於我哋11月上旬前往，雖然已經係紅葉期尾水，不過當日同時可以欣賞雪景，勁驚喜！喺谷川岳山頂食完暖粒粒嘅Lunch之後慢慢落山，坐返巴士就會前往一泊二食嘅温泉旅館。
詳細介紹：東京賞楓秘景：谷川岳紅葉雪山一次睇晒-上野出發只需2小時！
遊覽谷川岳
以11月上旬呢個時間前往谷川岳，雖然已經係紅葉嘅尾水，但係同時山巒都逐漸被白雪覆蓋。坐上纜車嘅時候四周圍仲係紅紅黃黃嘅景象，到纜車慢慢登上山頂嘅過程當中，窗外已經變成白茫茫嘅雪山景，呢個體驗絕對難忘！
入住温泉旅館：天空之湯 NAKAYA 旅館
今次揀嘅温泉旅館交通好方便，由谷川岳坐巴士大約15分鐘就到，周圍環境相當寧靜，設計都相當傳統，而且有私人温泉可以免費使用。
詳細介紹：遊覽谷川岳後必試温泉旅館一泊二食：天空之湯 NAKAYA 旅館
晚餐：温泉旅館懷石料理
晚餐Total有11個料理，相當豐富，而且味道新鮮之餘都好好味，而且有家庭感覺。由於料理數量多，旅館員工都會按住我哋進食進度去安排送餐，而且每一道料理都會用英文簡單介紹。
天空之湯 NAKAYA 旅館 地址
Day 4 重點：早餐：温泉自助早餐 > 返回東京 > 午餐：吾妻橋藪蕎麥 > Check-in 酒店 > 六本木聖誕燈飾
早餐：温泉旅館自助早餐
早餐係自助餐形式，同浴衣一樣，旅館都提供唔同嘅盤、碗、碟、餐具畀我哋自由配搭使用。食物種類都多元化，當日仲有一個新鮮士多啤梨奶昔超好味。
午餐：淺草吾妻橋藪蕎麥 超彈牙
下晝大約1點就返到上野，坐車嘅時候揾到一間喺淺草嘅蕎麥麵店，所以落車就直接過嚟食Lunch。呢間tabelog有3.72分嘅蕎麥麵百名店特色係鴨肉湯，無論係鴨肉定係個湯(沾汁)都好出色，啲麵條都彈牙，沾個鴨肉湯食味道鹹鹹地好開胃，見到唔少日本人都係叫幾盤麵咁食。
吾妻橋藪蕎麥 地址
下午茶：Cafe Meursault 晴空塔下飲咖啡
食完Lunch之後見距離Check-in酒店仲有時間，所以喺附近揾咗間對住隅田川嘅cafe坐低休息下。當日天氣比較涼，大部份客人都揀咗室內座位，我哋就住咗喺露台戶外嘅位，天氣好好可以望住晴空塔放空一下。我哋簡單叫咗兩件Cake同兩杯咖啡Hea咗一陣，隔住條河見到對面有座黑色大廈，天台竟然有一嚿造型勁似金色大便嘅裝飾，睇地圖發現原來係大名頂頂嘅Asahi啤酒嘅總公司orz。
Cafe Meursault 地址
再次Check-in JR東日本駒込METS酒店
飲完咖啡坐地鐵返去駒込站再Check-in酒店，喺Reception將行李單交畀職員，佢哋就推返我哋兩個行李篋出嚟。喺返上酒店房之前，喺升降機隔離有一個吧檯放住唔同嘅替用品，除咗牙刷、剃鬚刀之外，仲有好多款浴鹽可以拎，基本上每晚浸一個味都浸唔完呀。
晚餐：茅乃舍 關東煮套餐
離開酒店之後因為約咗個日本工作嘅朋友食飯同睇聖誕燈飾，所以就去咗六本木附近揾嘢食。行到Minato City見到地底有間賣高湯、調味料好出名嘅茅乃舍都有得食嘢，所以買完佢哋啲高湯之外就坐低。餐廳區座位唔多，Menu都比較簡單，主要係揀食幾多款關東煮，而每樣料理都係用返茅乃舍自己嘅調味料製作，所以都可以大概知道適唔適合自己。另外，每個餐都會跟一碟包含6個醬料嘅碟，亦都係畀大家點食物之餘可以試味。呢度價錢唔貴，而且體驗幾有趣，未試過嘅朋友可以一試。
茅乃舍 Midtown Store 地址
六本木聖誕燈飾
雖然我哋今個行程並唔係踏正12月，不過上網睇返其實每年大約11月中，東京各地嘅聖誕燈飾都已經陸續開始，所以出發前Research一下好易揾到邊個區可以睇到。而次喺六本木睇燈飾，可能因為喺香港睇過規模大啲，氣氛好啲嘅，六本木現場唔算好有聖誕氣氛，亦唔算好靚，比較似日常都會見到一棵棵樹加啲燈咁。
Day 5 重點：東京華納兄弟波利波特影城 > 晚餐：迴轉壽司 > 遊覽池袋
嚟到第5日嘅行程，今日預計會用大半日喺哈利波特影城玩，跟住晚餐會去食一間標榜用北海道海產嘅迴轉壽司。
早餐：日本Mc Donald’s McGriddles
酒店對面就係Mc Donald’s，所以簡簡單單食個早餐就可以出發。
東京華納兄弟哈利波特影城
旅程出發前我哋喺Klook用HK$728買咗2套「門票+髮箍」，即係每人HK$364有一張入場券、一個售價1,000日元嘅髮箍。入場只需要打開Klook App入面門票憑證就可以掃QR Code入場，之後到入口旁嘅Souvenir Shop入面揀一個價值1,000日元嘅頭箍去排隊畀錢，向店員Show返個門票憑證，佢會幫你剪咗個價值牌就完成換領。
成個哈利波特影城佔地都唔細，而且入面有好多互動環節，玩完仲可以課金買返每一個Station嘅相同片。成個園區每一吋都係還原度超高嘅電影場景，行到每一個位置都好似置身電影入面咁，由11點入場玩到4點半離開感覺時間都過得好快。
Remark：寫文章係2026年4月睇返Klook哈利波特影城門票頁面已經冇咗呢個Option，不過而家門票價錢減到去6,300日元，大約係HK$310，變相自費1,000日元買髮箍都係一樣價錢。
哈利波特影城 地址及交通
園區位置喺西武池袋線/都營大江戶線嘅豐島園站，出閘後跟住路牌行大約10分鐘就到達。
晚餐：Toriton 迴轉壽司 池袋東武店
當日晚餐食嘅迴轉壽司 Toriton 喺Tabelog上面係3.46分，魚生味道同質素冇話好驚艷，價錢方面，同香港壽司郎食嘅量差唔多嘅情況下，埋單大約貴20-30%。
不過以排隊嘅時間比香港排壽司郎短，當日攞飛後大約1小時QR Code個網站會提醒你返餐廳排隊，過程中間可以喺樓下商場行街消磨時間。到你個號碼之後要去門口店員度拎個電子號碼牌，等多15分鐘後震動後就入座。
值得一提係餐廳位置十分難揾，雖然知道樓層，但係個商場係兩幢連埋一齊，而且部份樓層唔相通，一開始都揾咗一段時間先上到去。
連日本人自己都揾唔到就知有幾難揾 ／ 又或者話個商場指引真係好差
Toriton 迴轉壽司 池袋東武店 地址
Day 6 重點：前往橫濱 > 橫濱八景島海景樂園 > 同小水瀨握手 > 晚餐：RUCY+R咖哩
第6日嘅行程重點係去橫濱嘅主題樂園睇動物、同小水瀨握手，交通全部都係以鐵路代步，過程都相當簡單。
橫濱八景島海景樂園
由酒店出發，大約用1.5小時就到達位於橫濱海濱線嘅八景島站。出閘後跟住指示過橋就會到達園區，由於整個園區係包括水族館、機動遊戲、購物中心、餐廳等，所以要跟住指示行先快速去到水族館。入場門票可以即場/官網/Klook等平台購買，而所有動物互動環節都需要事前喺官網購買，之後會寫一篇教學分享買飛攻略。
今次我哋買咗水族館嘅飛，可以入室內水族館睇海豚、企鵝呢啲海洋動物之外，仲可以喺室外親手摸魔鬼魚、小鯊魚、超近距離睇海豚、睇埋白鯨表演，加埋我哋預訂咗同水瀨握手餵食，全日嘅體驗都好豐富滿足。
離開時大約4點半已經日落緊，沿路步行返去地鐵站可以望到好靚嘅夕陽景色，係全日最好嘅結尾。
橫濱八景島海景樂園 地址
晚餐：RUCY+R 素食咖哩專門店
晚餐我哋喺橫濱站附近商場揾到一間幾有特色嘅咖哩專門店，Tabelog評分係3.48分。餐廳嘅咖哩選擇有4款，配料有多種蔬菜，可以自由拼出想食嘅咖哩飯，如果有選擇困難都可以揀一啲套餐。整體風味唔錯，而且幾啱鍾意菜多過肉嘅朋友嚟試。
RUCY+R 橫濱JOINUS店 地址
Day 7 重點：遊覽澀谷 > 東京巨蛋睇棒球
嚟到行程尾聲，今日主要想睇日本vs韓國棒球賽之前喺澀谷周圍行下買下嘢，所以經過想行嘅舖頭都入去望下。
早餐：人間關係 cafe
早餐喺網上面見到介紹去咗呢間Tabelog有3.53分嘅Cafe，早餐時段餐廳有賣限量嘅Scone，我哋一次過夾咗4個味嚟試，味道大失所望，建議大家叫返三文治或者其他食物，咁樣可能先會明白佢拎到3.53分嘅原因。
食物雖然唔得，但係餐廳環境算有特色，感覺有啲似漫畫入面嘅餐廳，不過都未必會去第2次。
人間關係 cafe 地址
遊覽澀谷
澀谷好容易就揾到MEGA DONKI、LOFT 101、無印良品、Tower Records，仲有好多人氣品牌都揾得到。澀谷Tower Records都係其中我哋留低最長時間嘅舗頭。
晚餐：俺流鹽拉麵
行完一輪之後因為要準備去睇波，所以出發去東京巨蛋之前，喺車站附近一間拉麵店早少少食個晚餐。雖然喺Tabelog上面獲得3.13分，但係味道方面又唔算差，無論係湯麵定沾麵選擇都有好多。喺門口售票機撳完機，坐低冇幾耐拉麵就送到，枱面有唔同調味料、紫菜碎等可以隨便使用，整體嚟講冇令人失望。
俺流鹽拉麵神宮前店 地址
侍JAPAN系列賽2025 日本VS韓國
今次喺出發前一個月已經喺日本棒球國家隊：Samurai Japan官網搶好飛，當日球賽18:30開始，我哋預早咗大約1個鐘去到球場外面換領返日本隊波衫，之後就入場坐低。相較台灣、韓國嘅棒球賽唔同，日本棒球賽唔會有啦啦隊企喺觀眾席前面一路跳一路打氣，而係由球迷主動打氣，啦啦隊通常係開場或者半場時喺草地上表演，so far喺日本睇過幾場棒球賽現場氣氛都係超好。另一特色係球場嘅樓梯會有唔少兼職女仔/男仔賣啤酒、汽水、雪糕，可以唔離開座位就有嘢飲。如果肚餓，亦都可以隨時去球場走廊嘅眾多食檔買食物。
如果想親身感受日本棒球，直接到唔同球隊嘅官網，用香港信用卡就可以買到波飛。
大阪嘅甲子園主場球隊係阪神虎：HanShinTigers官網
福岡PayPay Dome嘅主場球隊係軟銀鷹：SoftBankHawks官網
札幌巨蛋嘅主場球隊係北海道日本火腿鬥士：HamFighters官網
東京巨蛋主場球隊係讀賣巨人：TokyoGiants官網
想睇晒全日本唔同球隊幾時比賽可以睇返 NPB官網
Day 8 重點：遊覽日暮里 > 前往成田機場
由於我哋會坐18:00起飛嘅航班，預計3點鐘就出發去成田機場，睇過網上面介紹就去咗方便坐Skyliner嘅日暮里站，見到車站有Locker可以寄存行李，所以我哋都早啲就Check Out酒店過嚟搏一搏，最終都成功揾到2個大Locker放行李。提提大家可以喺呢個車站買定Skyliner車票，因為好難估計車票會唔會賣晒，萬一晏咗買唔到啱時間嘅車飛，遲咗去機場就好麻煩。
早餐：Oniyanma 烏冬
今個旅程最後嘅早餐用烏冬作結，呢間烏冬店喺Tabelog獲得3.59分，而且就喺車站旁，超方便。味道方面，佢哋嘅讚岐烏冬口感好好，湯底係傳統嘅清湯，無論烏冬定係各款天婦羅都係即場整，價錢亦十分公道，CP值好高。
Oniyanma 日暮里店 地址
遊覽日暮里
日暮里主要由谷中銀座商店街同相連嘅幾條街道組成，相比巢鴨，呢度店舖唔算多，但係遊客就幾多。可以喺度花嘅時間，其實頂盡大約1小時，想喺呢度消磨多啲時間，就可以幫襯吓Coffee Shop或者少量嘅小店。
谷中銀座商店街 地址
CX505 回港
到咗機場之後，仲有時間可以買吓手信，行吓免稅店，發現其實好多市區人氣手信喺機場都買到，除非有指定想買嘅零食，如果唔係其實大家可以慳返旅行時間，最後喺機場度一次過買。
總結 (去趣行程連結)
今個旅程最滿足係去咗谷川岳，風景真係好靚，加埋温泉旅館成個體驗都好正，有機會去東京都會想再花1-2日小間過嚟。而食物方面，以食過幾間都係Tabelog3分以上，4分以下嘅餐廳，部份都真係吹大咗，可能係唔啱口味，又或者根本唔值得用咁多時間去排隊食，所以嚟緊再去東京，如果預計要計咁耐隊嘅，一律建議放棄。希望呢個8日行程可以幫到各位規劃下個東京旅程，亦都畀到一啲新景點/諗法畀大家，下篇文再見～
旅遊時間：9/11/2025-16/11/2025 (8日7夜)
如果你有用開去趣App計劃行程，可以到東京秋季8日7夜行程：紅葉+雪山+温泉+哈利波特影城+棒球+水瀨握手加入你嘅行程！
